စွမ်းရည်မြှင့်တင်ရေး

(၃၀.၉.၂၀၂၃)ရက်နေ့တွင် ကချင်ပြည်နယ် MWCDF အသင်း ဥက္ကဌနှင့် အဖွဲ့ဝင်များသည် လူမှုဝန်ထမ်းဦးစီးဌာန၊ အိမ်တွင်းမှု သက်မွေးလုပ်ငန်းပညာသင်ကျောင်းမှ မြစ်ကြီးနားမြို့၊ ဗလမင်းထင် စက်မှုဘုန်းကြီးကျောင်း၌ ဖွင့်လှစ်ခဲ့သော ကျေးရွာအခြေပြု အခြေခံစက်ချုပ်သင်တန်းဆင်းပွဲ အခမ်းအနားတွင် တက်ရောက်၍ သင်တန်းတွင် ဆုရရှိခဲ့သောသင်တန်းသူ(၃)ဦးအား ပထမဆု အပ်ချုပ်စက်(၁)လုံး၊ ဒုတိယဆု လျှပ်စစ်မီးပူနှင့် တတိယဆု ချည်ပေါင်းသားဝမ်းဆက်များ ချီးမြှင့်ပေးခဲ့ပါသည်။    

(၂၂.၈.၂၀၂၃ မှ ၂၃.၈.၂၀၂၃)ရက်နေ့အထိ ပဲခူးတိုင်း MWCDF အသင်း ဥက္ကဌသည် ပဲခူးတိုင်းဒေသကြီးနှင့် မွန်ပြည်နယ်တို့ ပူးပေါင်းပြီး Legal Clinic Myanmar ဥပဒေရေးရာကုစားရေးအဖွဲ့(မြန်မာ)က ပဲခူးမြို့၊ ကမ္ဘောဇသာဒီဟိုတယ်၌ ဖွင့်လှစ်သည့် ဥပဒေရေးရာအသိပညာပေးခြင်း(၂)ရက်တာသင်တန်းသို့ တက်ရောက်ဆွေးနွေးခဲ့ပါသည်။

(၁၆.၈.၂၀၂၃)ရက်နေ့၊ နေပြည်တော်တိုင်း MWCDF အသင်း ဥက္ကဌနှင့် အဖွဲ့ဝင်များသည် နေပြည်တော် လူမှုဝန်ထမ်းဦးစီးဌာနမှ ပြန်ကြားရေးနှင့် ပြည်သူ့ဆက်ဆံရေးဦးစီးဌာန Community Center ခန်းမတွင် ဖွင့်လှစ်သော “ လူမှုရေးရာဖြစ်ရပ် စီမံခန့်ခွဲမှုအသိပညာပေးသင်တန်းနှင့် ပဋိပက္ခအတွင်း လိင်ပိုင်းဆိုင်ရာအကြမ်းဖက်မှု တားဆီးကာကွယ်ရေးနှင့် တုံ့ပြန့်ဆောင်ရွက်ရေးဆိုင်ရာ အမျိုးသားအဆင့် လုပ်ငန်းစီမံချက်အကောင်အထည်ဖော်မှုနှင့် တိုင်ကြားရေးယန္တရားအား ပြည်သူသို့ အသိပညာပေးသင်တန်း” တွင် တက်ရောက်ခဲ့ပါသည်။

(၁၁.၈.၂၀၂၃)နေ့တွင် ရှမ်းပြည်နယ်(တောင်ပိုင်း) MWCDF အသင်း ဥက္ကဌနှင့်အဖွဲ့ဝင်များသည် တောင်ကြီးမြို့၊ ခိုင်မေတ္တာဆေးရုံ စာသင်ခန်းမတွင် အသင်းသားအသစ်များအား အသင်းဝတ်စုံများ ပေးအပ်ခြင်းအခမ်းအနား ကျင်းပပြုလုပ်ခဲ့ပါသည်။ အခမ်းအနားတွင် –             အသင်းအကြောင်း ရှင်းလင်းပြသပေးခြင်းနှင့် အသင်းလှုပ်ရှားမှုအဖြစ် အသက်မွေးဝမ်းကျောင်း အတတ်ပညာတစ်ခုဖြစ်သော ဆပ်ပြာဆီထုတ်လုပ်ခြင်းနှင့် လက်သန့်ဆေးရည်ပြုလုပ်နည်းပညာများကို လက်တွေ့သင်ကြားပို့ချပေးခဲ့ပါသည်။ အမျိုးသမီးများ လူမှုစီးပွားဘဝဖွံ့ဖြိုးတိုးတက်စေရေးအတွက် ဆပ်ပြာဆီဖျော်နည်းသင်တန်းနှင့် Handgel ဖျော်နည်းသင်တန်းကို လက်တွေ့ပို့ချပေးသည့်အပြင် ကုန်ကြမ်းမှ ကုန်ချောစနစ်ထိ ထုတ်ပိုးမှုစနစ်အဆင့်ဆင့်ကို လက်တွေ့ပြသပေးခဲ့ပါသည်။